Mujh ko thame hue baahen us kii

Cheharaa mera thaa nigaahen us kii
Khaamoshii mein bhi vo baaten us kii

mere chehare pe Gazal likhatii gayi
sher kahatii hui aaNkhen us kii

shokh lamhon kaa pataa dene lagiin
tez hoti hu_i saansen us kii

aise mausam bhii guzaare ham ne
subahen jab apani thi shaamen us kii

dhyaan mein us ke ye aalam thaa kabhii
aankh mahataab ki yaaden us kii

faisalaa mauj-e-havaa ne likkhaa
aandhiyaan meri bahaaren us kii

nind is soch se Tuuti aksar
kis tarah katati hai raaten us kii

duur rah kar bhi sadaa rahati hai
mujh ko thaame hue baahen us kii